| Description |
Ya ngai hkai na maumwi gaw myit hkrum ai a majaw awng dang ai lam hpe e hkai dan na re. Moi shawng de da u hka ma, jinu ma, jingling u di ma, u kasha ma, shanhte gaw grai hkau ai jinghku ni re da. Jingling u di ngu ai gaw anhte yawng chye ai hte maren, kachyi sha law hte, u dai ni gaw da ga hkan she tsip galaw na nga nga re ai da. Lani mi gaw dai mare kaw e grai luk suk kaba ai magwi u hpung mi gaw lai wa ai da. Magwi a na ningbaw wa gaw grai myitsu ai da. U kasha jingling u gaw sa na shi gaw shi a na singkaw ni hpe e a buk na ngai na udi ndai kaw nga ai, ga ndai kaw hkum kabye ya ngu tsun ai shaloi magwi ningbaw wa gaw dai u di hpe e shi lagaw hte e kaup takra da ya ai da. Dai hku lai mat wa ai magwi ni mahkra ni yawng lai mat yang shi gaw bai nye hpang kaw magwi langai grai n kaja ai langai nga ai, dai hpe mung tawngban u yaw ngu tsun ai da. Dai hku lajin na matu jingling u kasha mung la taw nga ai shaloi da magwi langai sha re dai wa gaw lai wa ai da. Dai hpe mung jingling u kasha gaw tawngban na nye u di hpe hkum kabye ya yaw ngu yang, gara kaw re na u di ngu na ma kabye kau ya na shi a jit hte bai shayawng kau ya ai da. Dai majaw jingling u di gaw, u di ni mahkra brep mat ai majaw grai hkrap nga ai da. Shaloi jinu sa wa ai da. Hpa rai hkrap ai law ngu tsun lam hpe tsun dan ai da, u hka ma sa wa ai da, sa wa di na hpa nra ai, ya shanhte ba na shi yup taw nga ai shara kaw e ngai u hka gaw shi a myi achye baw ya na re, shingrai shi myi ni machyi na nga taw ai shaloi gaw ndai jinu gaw di di bang ya u ngu tsun ai da. Dai shaloi gaw shu jinghku wa mung bai sa wa na, e mai sa ngai ma shi e hto hka nnga ai de shara shagu de ngai ngoi ya na, shaloi shi gaw hka hkam tam lu hkawm ai nga yang shi a hkrup si mat u ga, ngu tsun ai da. Shanhte kaja wa sha dai hku na myit nga ai hte, magwi nkaja ai dai wa hpe e yup nga ai kaw u hka gaw makau hkan nga rai, myi hpaw dat ai hte achye baw kau ya ai da. Achye baw ya na shi gaw hto ra maga hku bai galeng yup nga yang gaw, dai hku mung myi bai hpaw dat ya uhka achye baw ya, 3ya, 4 ya rai yang jinu gaw di bai di bang ya ai da. Dai hpang shi gaw hka grai lu mayu na hka tam hkawm yang, shu gaw hkaraw n hkap mung nre, hka nnga ai hkan shi gaw ngoi chyu ngoi jang gaw nkaja ai magwi gaw shu ngoi ai kaw hka nga na re ngu hkan tam hkawm ai shaloi shi gaw galau di hkrat si mat ai da. Dai majaw dai hpa n gun mung n rawng ai u hka ni, jinglung u di ni, jinu ni, shu ni gaw grai pyaw na magwi jasi ai ntsa kaw e shanhte gaw manau dum ai da. Dai majaw gaw myit hkrum ai majaw awng dang lu ai lam hpe e sara ma gaw hkai dan ai re. |
