| Description |
Ya ngai hkai na maumwi gabaw gaw gamoi hte kanam ngu ai gabaw hte seng na hkai sa wa na re. Moi ndai dinghku langai mi kaw e gamoi hte kanam gaw grai n htuk hkat ai da. Gai shada da ndai galoi mung grai pawt hkat, shada da n ju n dawng re na e grai nga npyaw shan moi gaw dai hku re na kamoi mung grai matse, grai dang sha, grai roi sha re na she, ndai kanam gaw gamoi a dang sha ai zingri sha ai gamoi a n hkru ai lam hpe e ndai kanam gaw ndang hkam sha wa ai shaloi shi gaw grai myit htum wa na she kamoi hpe e sat kau na re, nye moi hpe sha nsat kau yang ngai nga pyaw na lam nnga ai ngu she, lani mi sarawun kaw sa re na e sarawun hpe she e sarawun e tsi du e nang kaw ngai garum hpyi sa ai re ngu na sa tsun ai shaloi dai tsi du wa gaw e hpa baw garum hpyi mayu ai rai ngu yang she, nye moi gaw grai n kaja ai, grai matse ai majaw ngai shi hpe e sat kau mayu ai. Ya jang si mat ai baw nre sha, gau ngwi ngwi re na si mat wa ai baw tsi jaw rit ngu na she dai hku sa tsun re shaloi ndai tsi du wa gaw e mai sa, mai sa ngai garum ya na ngu na she dai hku hkap la re na e shi hpe e tsi ni jaw dat ai da. Retim ndai tsi du wa jaw dat ai tsi gaw si wa ai baw tsi nre ai da, ndai grau nna hkam kaja, hpum wa ai baw tsi mahtang she ndai num hpe jaw dat ai da. Re yang gaw kanam mung grai myit pyaw sai da, gamoi hpe lu sat kau na re sai nga na she tsi dai la wa re na gamoi hpe e ndai lu sha ni sha ai kaw she ndai tsi gaw bang jaw jaw re da. Ndai aten galu bang jaw ai shaloi gaw ndai gamoi wa gaw grai hkam kaja wa na she shawoi na hta grau na hpum tsawm wa na she ndai shi hkam kaja wa magang shi na ndai pawt mayu ai ni gaw yawm mat wa magang re na hku nga. Mi ndai kanam hpe ndai tsi du wa tsi jaw dat ai shaloi gaw ndai hku ma htet dat ai da, ya na moi hpe e ndai tsi ma wa jaw na e shi kade pawt timmung nang na ntsa kade ram n kaja ai hku galaw timmung nang gaw shi kata kaw hkam sharang nna e nang gaw n pawt ai sha atsawm sha shi roi sha ai hpe nang hkam kau na shi hpe gaw nang grai kaja ai hku sha galaw u, ya shi gaw nau nna yang si mat sana re majaw gaw shi kade pawt yang pawt, nang gaw hpa hkum tsun sa, dai hku atsawm sha shi hpe ma atsawm sha galaw daw, mu mu mai mai galaw jaw di na, shi kata kaw nang gaw grai kaja ai hku nga ya u ngu na dai hku htet dat, kaja wa mung kanam gaw gamoi hpe tsi gaw lu sha kaw bang jaw bang jaw di na she shi mung kaja wa kamoi hpe grai tsawra ai hku na lu sha ni atsawm galaw jaw di na she shan moi dai hku re ai da. Gamoi mung kaja wa kanam a ntsa kaw she grai kaja wa ai da, kanam hpe grai matsan dum ai myit bai rawng wa ai da. Gamoi mung re jang she, ndai kanam gaw 1 ni mi na ahkying aten hta tsi du wa kaw ai sa wa ai da. Bai sa wa re yang she e tsi du e nang hpe kalang mi bai garum hpyi na matu sa wa ai ngu she, hpa baw bai garum hpyi na rai ngu yang she, e nye moi ya grai kaja mat sai, grai myit su mat sai, ngai hpe mung grai tsawra mat sai, nye n tsa kaw grai kaja mat sai. Dai majaw ya ndai nye moi nsi na matu, nsi wa ai baw bai jaw rit ngu ai da. Dai shaloi she e ndai tsi du wa gaw e grai hkrak sai nan moi grai hkrak sai, ngai nang hpe jaw dat ai tsi gaw si wa ai baw tsi nre gaw, hkam kaja wa ai, hpum tsawm wa ai baw tsi she re gaw ngu na shi hpe bai tsun dan re shaloi gaw tsi du mung grai kabu na, shan moi mung grai pyaw na e shada grai tsawra hkat, grai matsan dum hkat re na e grai pyaw na nga mat ai da, maumwi gaw ndai hte re sai. |
