| Description |
Ya tsun dan na maumwi gaw matsan la 2 a lam hpe e tsun dan na hku re. Ndai matsan la 1 mi gaw dai la shi gaw nau matsan ai majaw ndai matsan la marai 2 kaw na 1 mi gaw grai matsan ai majaw shi gaw hpaga ga hkawm mat wa ai. Dai shaloi e shi gaw 9 ning na mat wa ai ten hta shi gaw hto sumtsan hkawm na shi hpaga ga hkawm re ten hta e shi gaw n awngdang hkraw ai, retim mung lani mi na hta gaw shi gaw hkrun lam hkawm taw nga ai kaw grai pu ba let garen gari let ma hkan nu ni e gara hku na tam lu tam sha, gara hku na jaw sha na gara hku bau maka na shi myit ru myit tsang let shi hkawm sa nga ai kaw e hpan wa sagya dingla langai mi hte hkrum ai. Shi gaw ndai baw ah hpraw re dingla langai mi hte hkrum ai, dai baw hpraw dingla gaw hpan wa sagya re ngu ai lam hpe e chye lu ai, dai hpan wa sagya gaw e matsan la wa e ngai sha e nang ya gara de sa wa nta? nga san shaloi e ah ji e ngai gaw nau matsan ai majaw nye a madu jan, nye a kasha ni hpe e tam jaw tam ya bau maka na matu ja gumhpraw sut gan tam bram hkawm ai wa re nga nngai lo ngu tsun da. E rai sa rai sa, re jang gaw nang, nang tam ai sut gan hpe nang lu sai, ngu na nang myit la nu yaw nga na she dai baw hpraw ji dwi dingla gaw shi hpe e ndan 1 mi jaw dat ai. Dai ndan hte hpawn ndan pala mung shi 3 jaw dat ai. Ndan pala 3 hpe mung jaw dat, nang ndai hpai na wa su, wa nna e na nta kaw du ai shaloi nang ra ai hpe e hpyi nna nang ra ai hpe hpyi tsun nna ndai pala ndai ni hpe gap u yaw, nang ra ai lam ma hkra hpe e lu la na ndai, lu la na nit dai ngu na jaw dat ai nga hpe e chye lu ai. Dai majaw dai matsan la wa gaw kabu gara hte e ah ji e grai kabu sai, grai kabu sai, chyeju kaba dum sai nga na, ja gumhpraw nlu timmung dai jidwi baw hpraw dingla wa jaw dat ai ndan hte ndan pala hpe hpai na nta de wa re shaloi gaw nta kaw madu jan gaw madu jan mung la ding da taw nga ai, la dingda taw na nta de du wa re shaloi gaw e goi e shang e an nu ni a kawa e wa rit wa rit, ya nang shaning 9 ning tup she e an nu ni hpe tawn kau da na hpaga ga hkawm ai wa ya grai pu ba wa na nit dai, wa rit wa rit nga na hka ni du jaw, re na she kabu gara hte hkap tau hkalum la, reng gaw madu jan pyi nsan shi yang dai matsan la wa gaw e ma yen nu ni e ya ngai kawa ja gumhpraw hpaga ga tam hkawm ai wa ja gumhpraw gaw kaga mi n lu wa shi ai. Retim mung ndai hkrunlam kaw e ndai hkrun lam hkawm ai ngai ndai hka kau zaibru jang pa langai kaw grai ba na hkawm nga yang jidwi baw hpraw dingla langai hte hkrum nna ndai ndan hte pala hpe jaw dat ai. Ya ndai gaw an nu wa ni a sut rai sai, ndai hte e hpyi la na matu jidwi jaw dat ai re. Rai sa, rai sa hpa nra ai, hpa nlu wa tim hpa nra ai, grai kabu sai, nang hkam hkam jaja du wa ai rai sai du wa ai pyi gaw rai sa nga na kabu ai. Dai majaw dai shana atsawm sha kabu hkalum la na dai shana de gaw lagaw ta ni shin kau, shat ni sha la ngut re na gaw dai matsan la wa gaw nta n bang kaw na e ndan hpe shachyen la na ndai pala 1 mi hpe shawng gap, an nu wa ni rawng na tsawm htap ai dum nta ngu nna e gap dat ai shaloi gaw gap dat ai. Dan na e hpang e ndan pala ndan hpe shachyen la na kalang bai gap dat ai shaloi gaw ah ja gumhpraw, lu u ga ngu na e ah ja, gumhpraw tai u ga ngu na e ndai nta hpring u ga ngu na e gap dat ai. Bai nna ndan pala 1 mi hpe kalang bai shachyen na gap dat ai gaw dusat yam nga, dumsu, ah nga, hpring u ga ngu na e shi gaw gap dat ai, dai shana gaw ah pyaw sha yup, hpang jahpawt bai n htoi htoi wa ai shaloi gaw lek nhku kaw mung ah ja majaw, gumhpraw majaw hpring, nta mung wut dek nta kaja tsawm tsawm re kaw shan nu wa ni yup taw, ja gumhpraw ni mung hpring, ntawt n ban le ndaw de mung lek dumsu u hpung da, nga u hpung da hpring taw, gumra da hpring taw re na gaw rai lusu sahte mat wa ai lam hpe e shanhte hkam la lu ai. Dai gaw kaja ai ga hpe e kaja ai ga, mang gala ga, myit galu kaba ai hte shada dinghku masha ni tsawra mahku mara na shada kaja ai ga, ngwi pyaw simsa ai ga si mani ai ga hpe e shaga ai marang e ngwi pyaw ai chyeju hpe hkam la lu ai lam hpe e anhte chye lu ai, bai nna e, matut nna dai matsan la langai mi gaw e hkau e nang gaw gara hku na lusu wa nta nga san shaloi gaw ngai gaw shing re na matsan nna hkrun lam hkawm ai shaloi e hkrun lam kaw e ah ji la langai hte hkrum ai, dai ah ji dingla jaw dat ai ndan pala hpe ning re gap dat shaloi ning re na lu wa ai re nga shaloi she dai la dai mung bai hkawm sa, bai hkawm re yang gaw kaja wa dai ah ji dingla hte bai sa hkrum ai da. Jidwi baw hpraw hte bai hkrum ai shi mung ndan hte ndan pala bai lu wa sa, bai du wa re shaloi gaw shi mng 9 ning na mat wa ai shaloi e nta bai du wa ai shaloi gaw shi nta lakang pyi n du shi she madu jan gaw lakang baw kaw na hkap matsa, hkap yu she ya nang gumhpraw tam hkawm ai gaw kanang, gumhpraw ah ja gaw kanang ta, ya dai ndan gaw hpa di na la wa ta? ngu na hkap matsa ai da. Hkap matsa hkap pawt re yang she madu wa hpe mung atsawm sha n hkalum re she, dan re madu wa hpe hkap pawt hkap matsa re jang she, dai madu wa gaw kalang ta ndan hpe shachyen la na rawt gap ai shaloi gwi nre yang, gwi hkyi sha nre yang gaw ngu na matsa let rawt gap dat ai da. Gwi gwi hkyi sha nre yang gaw ngu na gap dat na shing re dai shana gaw pawt let dan re yup mat wa re yang hpang jahtum gaw hpang jahpawt nhtoi bai htoi rawt wa shaloi gaw lek nhku ting gwi hkyi hkrai hkrai tup re na ntawt npan hkan gwi kaji gwi kaba gwi hte nyek nga na gwi hkai hpring ma. Hoan wa sagya jidwi bawhpraw wa jaw dat ai n dan hte ah dwi ni gwi hkyi ni sha nre yang gaw ngu na matsa nna pawt na gap dat ai majaw gaw hpang jahpawt gaw gwi ni, gwi hkyi ni jawng, gwi hte rawk nga na gwi sha hpring taw ai nga lam hpe anhte na chye lu ai, dai majaw gaw anhte dai ni du hkra anhte kashu kasha ni hpe sharin shaga yang e n kaja ai ga matsa mawa ga hpe n mai shaga ai nga na ndai maumwi mausa hpe la kap nna sharin shaga chye ai maumwi rai nga ai. |
