| Description |
Law hpa nna tsin yam tsin dam bai hkrum ai madu jan langai mi a lam hpe bai tsun dan na. Moi shawng e da nga hkoi sha ai da, nga hkan sha ai la langai nga ai da. Lani mi gaw shi gaw nga tam mat wa re jang shani tup nga tam yang nlu re, shi a na nga dawn myek kaw shana de du yang gaw nga langai mi kaji sha law ai nga langai wa mi lu myek la ai da. Shi gaw nga dai hpe sumri kaw na raw na hkyen ai shaloi gaw nga dai gaw tsun ai da. E e nga hkan ai wa e ngai hpe gaw hkum shadu sha yaw, ngai gaw moi gaw hkawhkam kasha re wa ya ndai kaw nga tai mat ai she re. Nanga ra ai mung mahkra jaw na, nang ngai e shadu sha yang gaw hpa akyu nrawng ai, nang dai ni hpa baw ra ai law ngu tsun ai shaloi dai ni gaw n gu ni sau ni simaw si mai ni ra ai nga jang, mai sa jaw dat na yaw nang hkingau kaw wa yu su nga na re nga na tsun ai da. Shi gaw dai nga kasha hpe san ai nang hpa na nga tai wa ai, ngai gaw ngu da, hkawhkam kasha re she, nye a na shangai nhtoi galaw ai shaloi wa, kahtawng ting hpe shaga ai wa, hpyi lu ai hpyi num langai hpe n shaga hkrup kau na shi gaw ngai hpe nang gaw nga tai mat u nga na ngai hpe nga shatai kau ai re. Shawng nna gaw nta kaw nu ni, nye wa hkawhkam ni gaw nga pat sadek kaw bang da ai wa lani mi maw laru ru na ngai gaw hka de shang mat ai re. Nang hpe ngai ya hpa mung shabyin ya na, ngai gaw ya nga sagya bai tai mat sai, kaja wa sha hkingau kaw wa yu yang wa nga kasha tsun ai hte maren n gu buri ni sau ni, shat maw shat mai, shan nga ni yawng hkra wa nga taw ai da, dai la na nta de wa grai kabu ai da. Hpawt ni hkan nang ra jang, ra shagu ngai kaw sa wa rit ngu, mai ai ngu, nta du yang madu jan gaw grai kabu ai da. E hpawt ni gaw labu palawng hpyi su yaw, kaja wa labu palawng ni lanam ta, kashung ta, kahtet ta hpun na labu palawng mahkra bai jaw dat ai da. hpang shani bai sa yang gaw nta ra ai da, nye madu jang gaw tsun ai gaw nta ra ai nga, mai sa ngu, nta hta ra ai yawng hkra bai mari ya ai da. Shaloi gaw e dai ten kaw gaw gumra ra ai, gumra leng ra ai ngu, gumra leng mung bai jaw, dai hku nga she poi sa na ngu yang jan grai ja ai da. Dai majaw e nga hpe wa tsun su law, jan hkum shaja jan dai ni gaw jan grai ja ai, jan hkum shaja ngu tsun u dai shaloi nga gaw tsun ai da. Jan ja ai ni marang htu ai ni gaw karai kasang hte sha seng ai, ngai nlu galaw ai, ngai gaw shinggyin masha kaw na nga tai ai re majaw ngai gaw nlu galaw ai yaw ngu tsun ai shaloi dai nga hkan sha ai madu jan grai pawt ai da. Ndai zawn hpa mung nchye galaw ai wa nga sagya bai tai masu, alaga ngu na shi gaw pawt ai da. Pawt ai shaloi madu wa gaw dai hku hkum tsun anhte lu na sha na dum nta ni mahkra jaw da sai, nang dai nga hpe hkum pawt loh ngu yang, pawt ai, pawt ai, na nga hpa akyu nrawng ai ngu jang madu wa gaw grai myit npyaw na hpang de sa na, nang hpa baw ra ai, ngai hpa mung nchye ra mat sai law ngu jang, ngai chye ai na madu jan gaw grai n kaja ai, myit kaja nrawng ai re majaw nang lu ai rai ni mahkra mung nnga mat sanu ga, dai ni kaw na nang mung ngai kaw hkum sa sa, madu jan mi na hte maren (kokko) hpun kaw e shi na ginsun chyanyap kaw sha dai hku sha anyi anya nga mat ai da. Hpa majaw nga yang karai kasang hpan da ai katsi kahtet ni hpe shi pawt ai, lu ai hpe myit ndik ai majaw, law hpa ai majaw hpang jahtum gaw matsan mayen rai nga ra mat ai lam re da. |
