| Description |
Transcription (Lu Hkawng)
Ga baw gaw kanu kawa n lu mat ai jahkrai ma, madu jan gaw grai kaja lu ai jahkrai ma a lam re. Moi kalang mi jahkrai ma langai mi nga ai da, shi gaw dai hkauna gaw galaw sha mayu Nga gaw n lu re nna yak taw ai majaw masha ni kaw hkauna galaw nchyang chyang re na dai hkau na madu ni na gaw shani galaw ya shana gaw shi na hkau na galaw la da, myi mu na matu htaw hpun du hkan, moi gaw wan ni n nga ai le, ya na zawn wan ni n nga prat i, re ai majaw hpun du hkan ni wan shinan ni gyit shakap da re nna galaw law re ai gaw shana shagu rai wa sai da. Ma dai gaw grai pu grai ba nna Hpan wa shagya gaw mu nna grai matsan dum ai da. Dai majaw lana mi she oh ra daram rai yang gaw shi a hkum ni lu wa na re nga nna, matsan dum nna lana mi dai jahkrai ma kaw sa ai da. ''E ma e, nang gaw hpa re nna shana wa mi hkau na galaw law re ai rai'' ngu yang she ''Chye ngai gaw grai matsan nna hkau na gaw galaw sha mayu Nga gaw n lu re ai majaw shani gaw Nga madu ni na galaw ya ai, shana gaw ngai na galaw la re ai law'' ngu yang she, ''E dai rai yang gaw nang sanit ning du ai ''u'' n lu ai i'' ngu yang she, lu ai nga ai da. ''Sanit ning du ai tsa yam gaw n lu ai i'' ngu yang she, lu ai ngu ai da. Kaja wa nga yang gaw n lu ai da, rai tim aw ''Dai rai yang gaw dai na anhte marai sanit sa manam na mai ai i'' ngu yang she, ''Mai ai le'' nga ai da. Shi gaw n lu ai rai tim mung oh ra ni n lu ai nga jang n sa manam na hkrit nna manam gaw grai ra re ai majaw ''Lu ai'' ngu la na she, shana de jau jau wa mat sai da. Madu jan hpe wa tsun dan ai da. ''Ning nu e dai ni gaw ngai hpe dai hku dai hku nga ai tsun ai la langai mi nga ai dai na manam sa na da, sanit ning ''u'' la n lu ai i ngu yang lu ai ngu sai, sanit ning tsa yam n lu ai i ngu yang lu ai ngu kau sai, dai re majaw ning nu e, nang gaw (kanu n rai shi ai le i... kanu e nga ai gaw bai lu wa na matu she n rai i) ya sanit ning du ai ''u'' la ma tam nna atsawm sha sat nna hkyen lajang da u tsa ma shahkrat da u shing rai nna manam du na ala nga ga'' ngu tsun ai da. Dai she madu jan mung kaja wa sha madu wa tsun ai hte maren atsawm sha lu hkra hkan tam lajang la nna, ''u'' ni sat shat, shat mai ni shadu kau re nna tsa yam ni sha jahkrat da re yang she, n sin grai sin wa yang she du wa ai da. Manam gaw manam ala la ai wa shat sha jin di na ala nga grai nsin sin ai she du yang she, ala nga re yang gaw kaja wa n sin grai sin yang du sai da. Du ai hte gaw hpun n ba ni ma shap da re na she dai du ai hte gaw lagaw ni lata ni shin shangun re na she ''Gai gai gai jahkring mi sa la mu'' ngu ''Naw sa la mu'' ngu yang she kaja wa manam dai ni gaw du ai hte wa she kalang ta yup galeng mat sai da. Shat mung n sha ai wa she yup galeng mat na she ning sha ngu ai da, ''Le ndaw de mai lang mi ma adik da u yaw'' sha ngu ai da. ''Anhte jahkring mi naw sa la na'' ngu yang le loi hkring gaw hka nta madu gaw shat jaw sha na ngu yang mung jasu yang mung n rawt hkraw re um ram ram pu nna mana maka tsan ai kaw na sa ai rai sam ai ngu na n jasu ai da. Shat n sha ai dai hku yup sai da. Hpang jahpawt bai jau jau shanhte sha na malu masha ni bai sha jin da tsa ni jahkrat da re na ala, nhtoi kade htoi jan law wa tim n rawt hkraw re, kaning re ai i mana na manam ni gaw ngu na sa yu yu yat sha lanyan sa wa nna nba ni sa ahpu yu yang wa she masha mung n re ai she, ja tawng wa she rai nga la ai da. ''Ga ndai gaw kaning re wa rai wa sai kun'' ngu na ndaw de bai sa wa yu yang mung Nga, Dumsu ni wa dun sha dun mailat gamam adik jun da ai wa she Nga ni wa dun hkrai dun jawng nga la re na she, shan gaw myit yu ai da. ''Ga ya kaning wa di sa na i'' ja mung nde lu mat, Nga mung lu mat re ai gaw masha ni na hkauna mung n galaw ya ra sai, an gaw grai sahti sai re ai majaw ''Manam ndai ni gaw moi na ni tsun tsun re ai shagya wa nga ai, hpan jaw hpan ya ai sha gya wa nga ai she rai sam ai law ning nu e'' ngu yang ''E rai na re law ning wa e dai ni kaw na gaw an gaw grai lusu sa na re ai majaw an zawn re ai n lu ai ni hpe ma garan ya di ga i'' ngu na shan gaw grai pyaw nna nga mat ai da. Htum sai maumwi gaw. |
